प्रतिनिधी//
आलापल्ली : राजे धर्मराव कला आणि वाणिज्य महाविद्यालयात राष्ट्रीय सेवा योजना (NSS) तर्फे “स्वच्छता ही सेवा पंधरवडा” हा उपक्रम दणदणीत उत्साहात राबवण्यात आला. महाविद्यालय परिसरात आयोजित या उपक्रमामध्ये प्राचार्य डॉ. एन. टी. खोब्रागडे, सर्व विभागांचे प्राध्यापक, शिक्षक, शिक्षकेत्तर कर्मचारी तसेच NSS स्वयंसेवक विद्यार्थ्यांनी सक्रिय सहभाग नोंदवून समाजोपयोगी कार्याचा आदर्श घालून दिला.
राष्ट्रीय सेवा योजना अधिकारी प्रा. दया मेश्राम यांच्या मार्गदर्शनाखाली विद्यार्थ्यांनी महाविद्यालयाचा संपूर्ण परिसर स्वच्छ केला. कचरा गोळा करून त्याची योग्य पद्धतीने विल्हेवाट लावण्यात आली तसेच प्लास्टिकमुक्ती, स्वच्छता आणि पर्यावरण संवर्धनाबाबत विविध घोषणांनी परिसर दुमदुमून गेला. “स्वच्छतेतून आरोग्य, स्वच्छतेतून प्रगती”, “माझी स्वच्छता – माझी जबाबदारी” अशा घोषवाक्यांनी विद्यार्थ्यांनी जनजागृतीचा संदेश दिला.
प्राचार्य डॉ. खोब्रागडे यांनी आपल्या भाषणात विद्यार्थ्यांना संबोधित करताना सांगितले की, “स्वच्छता ही केवळ वैयक्तिक गरज नाही तर ती सामाजिक जबाबदारी आहे. महाविद्यालयाने घेतलेला हा उपक्रम समाजात आदर्श निर्माण करणारा ठरेल.”
यावेळी अनेक विद्यार्थ्यांनीही आपले अनुभव व्यक्त केले. “स्वच्छता मोहिमेत सहभागी झाल्याने सेवाभावाची जाणीव अधिक दृढ झाली. आपण स्वतः स्वच्छ राहिलो तर समाजालाही स्वच्छतेचे महत्त्व पटवू शकतो,” असे मत एका स्वयंसेवक विद्यार्थ्याने व्यक्त केले.
या उपक्रमामुळे महाविद्यालय परिसर स्वच्छ आणि सुशोभित झाला असून विद्यार्थ्यांमध्ये स्वच्छतेबद्दलची जबाबदारी व समाजासाठी सेवाभाव दृढ करण्याचा प्रेरणादायी संदेश देण्यात आला.
