प्रतिनिधी//
आयकर संचालनालय (संसूचना और आपराधिक अनवेषण विभाग), नागपूर यांच्यावतीने एसएफटी (आर्थिक व्यवहार विवरण) अनुपालन व ई-व्हेरिफिकेशन योजना, २०२१ वर एक जनजागृतीपर परिसंवादाचे आयोजन गडचिरोली जिल्हा मध्यवर्ती सहकारी बँक, गडचिरोली येथील परिसरात करण्यात आले. या कार्यक्रमाचा उद्देश म्हणजे रिपोर्टिंग संस्था (REs) व व्यावसायिकांना आयकर कायद्यांतर्गत त्यांच्या वैधानिक जबाबदाऱ्या समजावून सांगणे आणि उत्तम अनुपालनास प्रोत्साहन देणे हा होता.
या परिसंवादात उप-पंजीकरण कार्यालये (SROs), गडचिरोली जिल्ह्यातील सहकारी बँका, व्यापारी संघटना, कर सल्लागार संघटना आणि जीडीसीसी बँकेचे व्यवस्थापक यांनी सक्रिय सहभाग नोंदवला. सुमारे ५० प्रतिनिधी या कार्यक्रमाला उपस्थित होते.
सत्राची सुरुवात श्री ऋषी कुमार बिसेन, अतिरिक्त संचालक, आयकर (I&CI), नागपूर यांच्या उद्घाटनपर भाषणाने झाली. त्यांनी ई-व्हेरिफिकेशन योजना, २०२१ ची रूपरेषा आणि तिचे महत्त्व विषद केले. त्यांनी एसएफटी डेटाचा कर अनुपालन व रिटर्न भरताना होणारा उपयोग समजावून सांगितला आणि FATCA व CRS या आंतरराष्ट्रीय चौकटीअंतर्गत फॉर्म ६१B सादर करण्याच्या जबाबदाऱ्यांवरही सविस्तर चर्चा केली.
यानंतर श्री डी. के. झा, आयकर अधिकारी (I&CI-2, नागपूर) यांनी तांत्रिक सादरीकरण केले, जे दोन भागांत विभागले होते.
पहिल्या भागात, करदात्यांचे ई-फायलींग पोर्टलशी असलेले संबंध, विशेषतः पोर्टलवर उपलब्ध असलेली माहिती कशी पाहावी व रिटर्न भरताना त्याचा विचार कसा करावा यावर भर देण्यात आला. तसेच, करदात्यांना ई-प्रोसीडिंग्जच्या अंतर्गत येणाऱ्या नोटिसेस व संदेश नियमितपणे पोर्टलवर तपासण्याचा सल्ला देण्यात आला.
दुसऱ्या भागात खालील प्रमुख मुद्द्यांवर मार्गदर्शन करण्यात आले:
ई-व्हेरिफिकेशन योजना, २०२१ ची मुख्य वैशिष्ट्ये
फॉर्म ६१A सादर करण्याच्या मुदती व अन्य रिपोर्टिंग जबाबदाऱ्या
डेटा क्वालिटी रिपोर्ट (DQR) चा वापर करून SFT फाईलिंगमधील त्रुटी दुरुस्त करण्याचे मार्गदर्शन
PAN पडताळणी टूल्स व फॉर्म ६०, ६१ आणि ६१A सादर करण्याची प्रक्रिया
पॉवर ऑफ ॲटर्नी (PoA) धारकांशी संबंधित व्यवहारांची रिपोर्टिंग
अनुपालन न केल्यास होणारे दुष्परिणाम
सत्रात एक मुक्त चर्चा सत्र घेण्यात आले, ज्यामध्ये सहभागी प्रतिनिधींनी SFT फाईलिंग व डेटा रिपोर्टिंग संदर्भातील अडचणी व शंका मांडल्या. यांचे समाधान श्री डी. के. झा यांनी सविस्तर दिले आणि विभाग सर्व रिपोर्टिंग संस्थांना वेळेवर आणि अचूक अनुपालनासाठी आवश्यक ते मार्गदर्शन देण्यास कटिबद्ध असल्याचे नमूद केले. सहभागींच्या शंकांचे निरसन श्री नितीन श्रीवास्तव, आयकर अधिकारी (I&CI-1, नागपूर) यांनी देखील मनपूर्वक केले.
कार्यक्रमाच्या शेवटी आयकर संचालनालय (I&CI), नागपूर यांच्यावतीने सर्व सहभागी संस्थांचे तसेच गडचिरोली जिल्हा मध्यवर्ती सहकारी बँक व्यवस्थापनाचे कार्यक्रमाच्या यशस्वी आयोजनात दिलेल्या सहकार्याबद्दल आभार मानण्यात आले.
कार्यक्रमाचे समन्वयन श्री हिमांशू शर्मा आणि श्री रामकृष्ण, आयकर निरीक्षक यांनी अत्यंत कौशल्याने केले, ज्यामुळे सत्र यशस्वी व संवादात्मक ठरले.
