प्रथमच, एकाच तालुक्यात सलग सेवा देणाऱ्या अधिकाऱ्यांना त्या तालुक्याबाहेर बदली सक्तीची
*पारदर्शकता आणि समानतेला प्राधान्य*
गडचिरोली, दि. 30 मे: जिल्हाधिकारी कार्यालयात महसूल विभागातील 117 अधिकाऱ्यांच्या बदल्या जिल्हाधिकारी अविश्यांत पंडा यांच्या अध्यक्षतेखाली समुपदेशन प्रक्रियेने आज करण्यात आल्या. या प्रक्रियेत पारदर्शकता राखली जात असून, अतिदुर्गम भागांतून सेवा दिलेल्या अधिकाऱ्यांना सुगम क्षेत्रात बदली दिली गेली आहे.
या वर्षीच्या बदली प्रक्रियेतील एक महत्त्वाचा नवीन आदेश म्हणजे, एकाच तालुक्यात सलग सेवा देणाऱ्या अधिकाऱ्यांना आता त्या तालुक्याबाहेर जाणे सक्तीचे करण्यात आले आहे. एकाच ठिकाणी दीर्घकाळ थांबणे टाळण्यासाठी आणि अनुभवी कर्मचाऱ्यांचे जिल्ह्यात अधिक व्यापक वितरण सुनिश्चित करण्यासाठी हा निर्णय घेण्यात आला असल्याचे जिल्हाधिकारी अविश्यांत पंडा यांनी सांगितले.
*बदली प्रक्रियेतील प्रमुख पैलू:*
* महसूल सहाय्यक, सहाय्यक महसुल अधिकारी, ग्राम महसूल अधिकारी, तलाठी व मंडळ अधिकारी अशा एकूण 117 महसूल अधिकाऱ्यांच्या विनंती व प्रशासकीय बदल्या करण्यात आल्या.
* दुर्गम भागातील सेवेला प्राधान्य: अतिदुर्गम भागात अनेक वर्षे सेवा दिलेल्या अधिकाऱ्यांना त्यांच्या सेवा अटी आणि वरिष्ठतेनुसार सुगम भागांमध्ये बदलीसाठी प्राधान्य दिले जात आहे.
* पारदर्शक समुपदेशन: समुपदेशन सत्रे जिल्हाधिकाऱ्यांच्या थेट देखरेखीखाली पार पडली.
* अनुभवाचे समन्यायी वितरण: एकाच तालुक्यातून बदली सक्तीची केल्याने, या अधिकाऱ्यांच्या व्यापक अनुभवाचा उपयोग सुगम क्षेत्रांमध्येही करून घेण्याचे विभागाचे उद्दिष्ट.
* सेवा अटींचा विचार: बदली प्रक्रियेत संबंधित सर्व कर्मचाऱ्यांच्या सेवा अटी आणि वरिष्ठतेचा बारकाईने विचार केला गेला.
