महाराष्ट्रातील गडचिरोली जिल्ह्यातील एटापल्ली तालुका हा अतिदुर्गम आणि मागास क्षेत्र म्हणून ओळखला जातो. हा भाग जंगलव्याप्त असून, येथे मूलभूत सुविधा अत्यंत मर्यादित आहेत. शिक्षणाच्या अभावामुळे अनेक विद्यार्थी तालुक्याच्या बाहेर जाऊन शिक्षण घेतात. प्रवासाची गैरसोय, दळणवळणाची अपुरी साधने आणि अपुऱ्या शैक्षणिक सुविधा यामुळे तालुक्यातील विद्यार्थ्यांना अनेक अडचणींना सामोरे जावे लागते. विशेषतः मुलींच्या शिक्षणासाठी मोठ्या अडचणी आहेत. त्यामुळे तालुक्यातील गरीब आणि मागासवर्गीय मुलींना शिक्षणाची संधी उपलब्ध व्हावी यासाठी शासनाने ‘कस्तुरबा गांधी बालिका विद्यालय आणि वसतिगृह’ सुरू केले आहे.
या वसतिगृहात ४० ते ५० अति दुर्गम भागातील मुली शिक्षण घेतात. त्यांची देखभाल करण्यासाठी महिला अधीक्षक आणि चौकीदार नेमण्यात आले आहेत. मात्र, येथे सुरक्षेच्या दृष्टीने अनेक त्रुटी समोर आल्या आहेत
मात्र, या वसतिगृहाच्या व्यवस्थापनातील निष्काळजीपणामुळे मुलींच्या सुरक्षिततेचा गंभीर प्रश्न निर्माण झाला आहे. नुकतीच येथे एक धक्कादायक घटना घडली. तीन मुली रात्रीच्या वेळी कोणालाही न सांगता वसतिगृहातील खिडकी फोडून बाहेर पडल्या आणि एटापल्लीजवळील एकरा गावात लग्नसमारंभाला गेल्या. दुसऱ्या दिवशी त्या एका मुलासोबत परत येत असताना त्यांचा रस्त्यावर अपघात झाला. त्यांना गंभीर दुखापत झाली असून, तातडीने उपचारासाठी दवाखान्यात दाखल करण्यात आले.
या घटनेनंतर पालक आणि स्थानिक नागरिकांमध्ये असंतोष पसरला आहे. मिळालेल्या माहितीनुसार, अशा घटना यापूर्वीही घडल्या आहेत, मात्र त्याकडे दुर्लक्ष करण्यात आले. वसतिगृहातील मुली रात्री बाहेर पडतात आणि सकाळी परत येतात, अशी माहिती समोर येत आहे. त्यामुळे मुख्याध्यापिका आणि वसतिगृह अधीक्षक यांच्यावर गंभीर आरोप होत आहेत.
या घटनेबाबत एटापल्ली पोलीस निरीक्षक कुकडे यांना विचारले असता, त्यांनी घटनेला दुजोरा दिला आणि पोलिसांनी चौकशी सुरू केली आहे. मात्र,अधिकृत माहिती घेण्यासाठी मुख्याध्यापिकांशी संपर्क साधण्याचा प्रयत्न केला असता, तो होऊ शकला नाही.
एटापल्लीतील कस्तुरबा गांधी बालिका विद्यालयाच्या वसतिगृहात घडलेल्या घटनेमुळे मुख्याध्यापिका आणि वसतिगृह अधीक्षक यांच्या निष्काळजीपणाचा गंभीर मुद्दा समोर आला आहे. रात्रीच्या वेळी तीन मुली खिडकी फोडून बाहेर पडतात, लग्नसमारंभाला जातात आणि दुसऱ्या दिवशी परत येत असताना अपघात होतो. हा प्रकार उघड झाल्यावरच व्यवस्थापनाला जाग आली, पण यापूर्वीही अशा घटना घडत असल्याचे स्थानिकांकडून सांगण्यात येत आहे. जर मुली वारंवार वसतिगृहाबाहेर पडत असतील, तर सुरक्षा यंत्रणा आणि जबाबदारी निश्चित करणारे अधिकारी काय करत होते, हा मोठा प्रश्न आहे.
या घटनेने पालकांमध्ये असंतोषाची लाट उसळली आहे. त्यांच्या मते, जर वसतिगृहात राहणाऱ्या मुली सुरक्षित नसतील, तर मुख्याध्यापिका आणि वसतिगृह अधीक्षक यांनी सुरक्षा व्यवस्थेकडे गंभीरपणे लक्ष दिले नाही, त्यामुळेच मुली सहजपणे बाहेर जाऊ शकल्या. पोलिसांनी चौकशी सुरू केली असली, तरी जबाबदार अधिकाऱ्यांवर त्वरित कारवाई होणे गरजेचे आहे, अन्यथा भविष्यात याहून गंभीर घटना घडू शकतात.
