अमित कत्तीवार
तालुका प्रतिनिधी
एटापल्ली : एटापल्ली तालुक्यात भारतीय जनता पार्टीच्या तालुका जनसंपर्क कार्यालयात भारताच्या ७७ व्या प्रजासत्ताक दिनानिमित्त ध्वजारोहणाचा भव्य, शिस्तबद्ध व राष्ट्रभक्तीपूर्ण सोहळा मोठ्या उत्साहात पार पडला. दिनांक २६ जानेवारी २०२६ रोजी सकाळी ७.४५ वाजता आयोजित करण्यात आलेल्या या कार्यक्रमात नागरिकांचा उत्स्फूर्त प्रतिसाद लाभला.या सोहळ्यात ध्वजारोहण मा. श्री बाबलाजी शांतीरंजन मुजुमदार (तालुका महामंत्री) यांच्या शुभहस्ते संपन्न झाले. ध्वजारोहणानंतर राष्ट्रध्वजाला मानवंदना देण्यात आली. यावेळी “जय हिंद” व “वंदे मातरम्”च्या घोषणांनी परिसर दुमदुमून गेला असून उपस्थितांमध्ये देशप्रेमाची भावना ओसंडून वाहत होती.कार्यक्रमाला भारतीय जनता पार्टीचे तालुका व जिल्हा पदाधिकारी, विविध समाज संघटनांचे पदाधिकारी, युवा मोर्चाचे कार्यकर्ते, महिला आघाडीचे प्रतिनिधी तसेच मोठ्या संख्येने कार्यकर्ते व नागरिक उपस्थित होते. सर्वांनी एकत्र येत राष्ट्रध्वजास अभिवादन करून प्रजासत्ताक दिनाचा गौरव साजरा केला.
याप्रसंगी उपस्थितांना संबोधित करताना भाजप तालुका अध्यक्ष मा. श्री प्रसाद चंद्रशेखर पुल्लूरवार यांनी प्रजासत्ताक दिनाचे ऐतिहासिक महत्त्व विशद केले. त्यांनी भारतीय संविधान हे देशाच्या लोकशाही व्यवस्थेचे आधारस्तंभ असून संविधानातील मूल्ये, स्वातंत्र्य, समता, बंधुता व न्याय या तत्त्वांवरच देशाची वाटचाल सुरू असल्याचे सांगितले. प्रत्येक नागरिकाने संविधानाचा सन्मान राखत राष्ट्रसेवा, सामाजिक सलोखा व राष्ट्रीय एकतेसाठी योगदान देण्याचे आवाहन त्यांनी यावेळी केले.तसेच देशाच्या स्वातंत्र्यासाठी व संविधान निर्मितीसाठी योगदान देणाऱ्या थोर नेत्यांच्या कार्याचा उल्लेख करत त्यांनी युवकांनी राष्ट्रनिर्मितीत सक्रिय सहभाग घ्यावा, असेही मत व्यक्त केले. उपस्थित कार्यकर्त्यांनी त्यांच्या भाषणास दाद देत टाळ्यांच्या गजरात समर्थन दर्शविले.संपूर्ण कार्यक्रम शांततापूर्ण व शिस्तबद्ध वातावरणात पार पडला. आयोजन समितीच्या नियोजनामुळे कार्यक्रम सुरळीत पार पडल्याचे चित्र दिसून आले. शेवटी राष्ट्रगीताने कार्यक्रमाची औपचारिक सांगता करण्यात आली.प्रजासत्ताक दिनानिमित्त आयोजित या ध्वजारोहण सोहळ्यामुळे एटापल्ली शहरात देशभक्तीचे वातावरण निर्माण झाले असून नागरिकांमध्ये नवचैतन्य संचारले असल्याचे दिसून आले.
