अमित कत्तीवार
तालुका प्रतिनिधी
एटापल्ली : जिल्हा सहकारी बँक ही जिल्ह्यातील अत्यंत प्रतिष्ठेची व प्रभावशाली आर्थिक संस्था मानली जाते. या बँकेच्या निवडणुकीकडे नेहमीच राजकीय वर्तुळाचे लक्ष लागलेले असते. यंदाच्या निवडणूक प्रक्रियेत मात्र एक महत्त्वपूर्ण राजकीय बदल पाहायला मिळत असून, अनेक वर्षांपासून एका विशिष्ट कुटुंबाच्या वर्चस्वाखाली राहिलेल्या सत्तेला प्रथमच ठोस आव्हान निर्माण झाल्याचे चित्र समोर आले आहे.
एटापल्ली–भामरागड तालुक्याच्या ‘अ’ गटातून एटापल्ली येथील रहिवासी सुनील शंकर तेलकुंटलवार यांची जिल्हा बँकेच्या संचालकपदी अविरोध निवड झाली आहे. ही निवड केवळ एका व्यक्तीच्या यशापुरती मर्यादित नसून, स्थानिक राजकारणातील बदलत्या समीकरणांचे प्रतीक म्हणून पाहिली जात आहे. या घटनेमुळे पारंपरिक सत्ताकेंद्रांना धक्का बसल्याचे मानले जात आहे.
या गटातून सुरुवातीला दोन उमेदवारांनी अर्ज दाखल केले होते. त्यामध्ये एटापल्ली येथील रहिवासी सुनील शंकर तेलकुंटलवार आणि दशरथ कोल्हा मडावी यांचा समावेश होता. निवडणुकीची चुरस वाढण्याची शक्यता असतानाच, अंतिम टप्प्यात दशरथ मडावी यांनी आपला उमेदवारी अर्ज मागे घेतला. त्यामुळे एटापल्ली येथील रहिवासी सुनील शंकर तेलकुंटलवार यांच्या नावावर अविरोध शिक्कामोर्तब झाले. मडावी यांची ही माघार केवळ औपचारिक नसून, पडद्यामागील राजकीय समन्वय, परस्पर संवाद आणि स्थानिक नेतृत्वावर असलेला विश्वास यांचे द्योतक मानली जात आहे.
या संपूर्ण प्रक्रियेत स्थानिक पातळीवर प्रभावी रणनीती आखण्यात आली होती. अजय भाऊ कंकडलावार आणि रमेश वैरागडे यांच्या मार्गदर्शनाखाली कार्यकर्त्यांनी संघटनात्मक ताकद दाखवली. निवडणूक बिनविरोध पार पडावी यासाठी सर्व स्तरांवर समन्वय साधण्यात आला. संदीप वैरागडे, प्रज्वल नागुलवार, कपिल मठ्ठामी, ज्ञानेश मट्टामी, दिनेश नरोटे, अशोक गावंडे, दीपक गावंडे आणि शिवाजी लेखामी यांनी सक्रिय भूमिका बजावत कार्यकर्त्यांमध्ये एकजूट निर्माण केली.
विशेष म्हणजे, ग्रामीण भागातील नेतृत्व एकत्र आणण्यात या कार्यकर्त्यांना यश आले. यामुळे संभाव्य मतभेद टाळून एकमुखी निर्णय घेण्यात आला. परिणामी, निवडणूक बिनविरोध होण्याचा मार्ग मोकळा झाला. या प्रक्रियेत स्थानिक स्तरावर नव्या नेतृत्वाचा स्वीकार झाल्याचे स्पष्ट झाले आहे.
राजकीय विश्लेषकांच्या मते, ही निवडणूक जिल्हा सहकारी बँकेतील प्रस्थापित सत्तेसाठी एक इशारा आहे. अनेक वर्षांपासून चालत आलेल्या एकतर्फी वर्चस्वाला आता पर्याय उभा राहत असल्याचे या निकालातून दिसून येते. भविष्यात या बदलाचा परिणाम बँकेच्या धोरणांवर आणि निर्णय प्रक्रियेवर होण्याची शक्यता वर्तवली जात आहे.
दरम्यान, एटापल्ली येथील रहिवासी सुनील शंकर तेलकुंटलवार यांच्या निवडीमुळे एटापल्ली–भामरागड परिसरात समाधान व्यक्त करण्यात येत आहे. स्थानिक प्रश्नांना प्राधान्य मिळेल, तसेच बँकेच्या कामकाजात पारदर्शकता आणि विकासाभिमुख धोरणे राबवली जातील, अशी अपेक्षा व्यक्त होत आहे.
आगामी काळात जिल्हा बँकेच्या कारभारात नव्या नेतृत्वाची छाप कितपत दिसून येते, तसेच या बदलामुळे जिल्ह्यातील राजकीय समीकरणे कोणत्या दिशेने वळतात, याकडे संपूर्ण गडचिरोली जिल्ह्याचे लक्ष लागले आहे.
