अमित कत्तीवार
तालुका प्रतिनिधी
एटापल्ली : गोंडवाना विद्यापीठ, गडचिरोली यांच्या वतीने आयोजित करण्यात आलेल्या आंतरमहाविद्यालयीन सांस्कृतिक युवा महोत्सव ‘भरारी-२०२६’ मध्ये एटापल्ली येथील भगवंतराव कला व विज्ञान महाविद्यालयाच्या विद्यार्थ्याने उल्लेखनीय यश संपादन करत महाविद्यालयाचा नावलौकिक वाढविला आहे. या स्पर्धेत महाविद्यालयाचा विद्यार्थी सचिन मिरवा गावडे याने विविध कला प्रकारांमध्ये आपले कौशल्य सादर करत मातीकला प्रकारात प्रथम क्रमांक तर स्थळचित्र (स्पॉट पेंटिंग) या कलाप्रकारात तृतीय क्रमांक पटकावला. त्याच्या या यशामुळे महाविद्यालयात आनंदाचे वातावरण निर्माण झाले असून सर्व स्तरातून त्याचे कौतुक केले जात आहे.
गोंडवाना विद्यापीठाच्या वतीने दरवर्षी आंतरमहाविद्यालयीन सांस्कृतिक युवा महोत्सवाचे आयोजन करण्यात येते. या महोत्सवामध्ये विद्यापीठाशी संलग्न विविध महाविद्यालयांतील विद्यार्थी मोठ्या उत्साहाने सहभागी होत आपले कलागुण सादर करतात. संगीत, नृत्य, नाट्य, चित्रकला, हस्तकला अशा विविध कलाप्रकारांच्या माध्यमातून विद्यार्थ्यांना आपल्या सर्जनशीलतेचे प्रदर्शन करण्याची संधी मिळते. यावर्षी आयोजित ‘भरारी-२०२६’ या युवा महोत्सवातही विद्यार्थ्यांनी मोठ्या उत्साहाने सहभाग नोंदवला.
या स्पर्धेत भगवंतराव कला व विज्ञान महाविद्यालय, एटापल्ली येथील विद्यार्थी सचिन मिरवा गावडे याने उत्कृष्ट कलात्मक कौशल्य दाखवत मातीकला प्रकारात प्रथम क्रमांक मिळविला. मातीपासून विविध आकर्षक कलाकृती साकारण्याच्या या स्पर्धेत त्याने अत्यंत कल्पकता आणि कौशल्य दाखवत परीक्षकांची मने जिंकली. त्याचबरोबर स्थळचित्र या स्पर्धेतही त्याने आपली चित्रकलेची प्रतिभा सिद्ध करत तृतीय क्रमांक पटकावला. दोन्ही स्पर्धांमधील या उल्लेखनीय यशामुळे महाविद्यालयाच्या शिरपेचात मानाचा तुरा रोवला गेला आहे.
सचिन गावडे याच्या या यशाबद्दल महाविद्यालयाच्या वतीने त्याचा सत्कार करण्यात आला. या प्रसंगी सांस्कृतिक विभाग प्रमुख प्रा. राहुल ढबाले यांचे मार्गदर्शन व सहकार्य विद्यार्थ्याला लाभल्याचे सांगण्यात आले. विद्यार्थ्यांच्या कलागुणांना वाव देण्यासाठी महाविद्यालयाकडून सातत्याने विविध उपक्रम राबविले जात असल्याचेही यावेळी नमूद करण्यात आले.
महाविद्यालयाचे प्राचार्य डॉ. एस. एन. बूटे यांनी विद्यार्थ्याचे अभिनंदन करत त्याच्या पुढील वाटचालीसाठी शुभेच्छा दिल्या. त्यांनी सांगितले की, विद्यार्थ्यांनी केवळ शैक्षणिक क्षेत्रातच नव्हे तर कला, क्रीडा आणि सांस्कृतिक क्षेत्रातही आपली ओळख निर्माण करावी, यासाठी महाविद्यालय सदैव प्रयत्नशील आहे. सचिन गावडे याने मिळवलेले हे यश इतर विद्यार्थ्यांसाठीही प्रेरणादायी ठरेल, असा विश्वास त्यांनी व्यक्त केला.
यावेळी महाविद्यालयातील सर्व प्राध्यापक तसेच शिक्षकेत्तर कर्मचाऱ्यांनीही विद्यार्थ्याचे अभिनंदन केले. सचिन गावडे याने आपल्या मेहनतीच्या जोरावर मिळवलेल्या या यशामुळे महाविद्यालयाचा गौरव वाढला असून भविष्यातही तो विविध स्पर्धांमध्ये यश संपादन करेल, अशी अपेक्षा व्यक्त करण्यात येत आहे.
