एटापल्ली : एटापल्ली नाका ते वीर बाबूराव शेडमाके चौक दरम्यानचा मुख्य रस्ता खड्डेमय अवस्थेत गेल्या अनेक महिन्यांपासून लोकांच्या दैनंदिन व्यवहारात अडथळा ठरत आहे. या मार्गावरून दररोज शालेय विद्यार्थी, महिला, दुचाकी व चारचाकी वाहनचालक यांचा प्रवाह आहे. विशेषतः पावसाळ्यात खड्ड्यांमध्ये पाणी साचल्यामुळे अपघातांचा धोका निर्माण होत आहे. या पार्श्वभूमीवर रस्त्याच्या दुरुस्ती व डांबरीकरणाची मागणी नागरिकांकडून सतत होत आहे.
याच संदर्भात **कॉ. सचिन मोतकुरवार (भाकपा, जिल्हा सहसचिव)** यांनी ३ सप्टेंबर २०२५ रोजी सार्वजनिक बांधकाम विभागाकडे मुख्य रस्त्यावरील खड्डे बुजवणे व कायमस्वरूपी डांबरीकरण करण्याची मागणी केली होती. या मागणीच्या अनुषंगाने सार्वजनिक बांधकाम विभाग, आलापल्ली येथील कार्यकारी अभियंता यांनी भाकपा नेत्याला लेखी पत्राद्वारे सविस्तर माहिती दिली आहे.
#### काय आहे विभागाचा अहवाल?
सार्वजनिक बांधकाम विभागाच्या अहवालानुसार, एटापल्ली येथील हा मार्ग **राज्यमार्ग क्रमांक ३६३ अंतर्गत नाग-१३७ प्रकल्पांतर्गत सिमेंट काँक्रीट (C.C.) रस्त्याकरीता मंजूर** आहे. करारनाम्यानुसार एटापल्ली गावात १२.०० मीटर रुंदीचा C.C. रस्ता प्रस्तावित होता; परंतु सध्याची वास्तविक स्थिती २४.०० मीटर रुंदीच्या रस्त्याची आहे, ज्यावर साधारणतः ९.०० मीटर रुंदीचा डांबरी (bituminous) भाग आहे. या फरकामुळे रस्त्याच्या रचनेत व करारनाम्यात बदल करावे लागणार आहेत. त्यामुळे **शासनाकडे वाव बदल प्रस्ताव सादर** करण्यात आला असून तो मंजूर न झाल्याशिवाय कायमस्वरूपी काम सुरू करणे शक्य नाही, असे पत्रात नमूद आहे.
#### रस्ता दुभाजकाबाबत स्थिती
विभागाने स्पष्ट केले आहे की, **एटापल्ली शहरातील मुख्य रस्त्याच्या मधोमध दुभाजक बांधण्याबाबतचा स्वतंत्र प्रस्ताव तयार करून शासनाकडे पाठविण्यात आला आहे. मात्र, सदर दुभाजकाला सध्यापर्यंत मंजुरी प्राप्त झालेली नाही.** त्यामुळे दुभाजकाचे काम सुरू करणे सध्या शक्य नाही.
#### तात्पुरती दुरुस्ती आणि कंत्राटदारांची जबाबदारी
विभागाने सांगितले आहे की, वाव बदल मंजूर होत नसल्यानेही नागरिकांसाठी वाहतुकीची सोय राखण्यासाठी करारनाम्याच्या कलमांनुसार संबंधित कंत्राटदारांना **रस्त्याची देखभाल व वेळोवेळी खड्डे दुरुस्ती करण्याचे** आदेश देण्यात आले आहेत. पत्रात नमूद केले आहे की खड्डे दुरुस्तीचे काम वेळोवेळी कंत्राटदाराद्वारे केले जात आहे व संबंधित छायाचित्रे संगृहीत आहेत. वाव बदल मंजूर होताच पूर्ण प्रकल्प ताबडतोब पुढे नेण्यात येईल, असे विभागाने स्पष्ट केले आहे.
#### भाकपा ची मागणी आणि भूमिका
भाकपा जिल्हा सहसचिव **कॉ. सचिन मोतकुरवार** यांनी विभागाच्या लेखी उत्तराबाबत प्रतिक्रिया देताना म्हटले, पालकमंत्री,आमदार ,खासदार ला खदान चा विकास सोडून प्रत्यक्ष एटापल्ली तालुक्याचा विकास करायला वेळ नाही आहे.
पुन्हा कॉ.सचिन मोतकुरवार म्हणाले की
**“विभागाने दिलेल्या माहितीनुसार वाव बदल प्रक्रिया पूर्ण झाल्यानंतरच कायमस्वरूपी बांधकाम शक्य आहे. मात्र, मुख्य रस्ता व दुभाजक काम दोन्हींच्या मंजुरी प्रक्रियेत होणाऱ्या विलंबामुळे एटापल्लीतील नागरिकांना दीर्घकाळ त्रास सहन करावा लागतोय. शासनाने तात्काळ मंजुरी देऊन ठोस बांधकाम सुरु करावे, हीच जनतेची मागणी आहे.”**
#### पुढील पावले
सार्वजनिक बांधकाम विभागाने वाव बदल प्रस्ताव तसेच दुभाजक बांधकामाचा प्रस्ताव शासनाकडे पाठवला आहे. **या दोन्ही प्रस्तावांना मंजुरी मिळाल्यानंतरच नाग-१३७ प्रकल्पांतर्गत C.C. रस्त्याचे बांधकाम आणि दुभाजकाचे काम सुरू होईल.** तोपर्यंत करारनाम्याच्या अटींनुसार केवळ तात्पुरती देखभाल व खड्डे दुरुस्ती केली जाणार आहे, असे विभागाने स्पष्ट केले आहे.
