प्रतिनिधी// रूपेश सलामे गडचिरोल्ली
गडचिरोलीः- येथील विविध सामाजिक संघटना व सामाजिक पक्षानी गोंडवाना विद्यापीठाद्वारा आयोजित ‘युगप्रवर्तक हेडगेवार’ या नाटकाच्या प्रयोगास तीव्र विरोध दर्शविला असून सदर नाट्यप्रयोग रद्द करण्याची मागणी केली आहे. हा नाट्यप्रयोग रद्द न झाल्यास नाट्यप्रयोगाच्या दिवशी दि. 30 जून 2025 रोजी विद्यापीठासमोर तीव्र आंदोलन करण्याचा इशारा सुध्दा या संघटनांनी दिला आहे.
गोंडवाना विदयापीठ गडचिरोलीच्या वतीने दि. 30 जून 2025 रोजी ‘युग प्रवर्तक डॉ. हेडगेवार’ या नाटकाचा प्रयोग विद्यापीठाच्या नवीन सभागृहात आयोजित करण्यात आला आहे. वास्तविक गोंडवाना विद्यापीठ ही संस्था शासनाचा निधी व विद्यार्थ्यांच्या शुल्कातुन चालवण्यात येते. त्यामुळे या विद्यापीठात एका विशीष्ठ विचारधारेचा प्रचार- प्रसार करणे अतिशय चुकीचे व बेकायदेशीर आहे. गोंडवाना विद्यापीठ हे विद्यार्थाच्या शैक्षणिक विकासासाठी सुरु करण्यात आलेले आहे. कोणत्या एका विचारसरणीच्या प्रचार प्रसारासाठी नाही, असे या संघटनांनी कुलगुरूंना सादर केलेल्या निवेदनातू म्हटले आहे.
डॉ. हेडगेवार यांचा विद्यार्थाच्या शैक्षणिक विकासासाशी अथवा देशातील दलीत – आदिवासी, अल्पसंख्यांक समुदायाच्या कल्याणाशी कोणताही संबंध नाही. असे असतांना डॉ. हेडगेवारांच्या जीवनावरील नाटक विद्यापीठाच्या वतीने विद्यापीठाच्या परिसरात आयोजित करणे पुर्णतः अनुचित तर आहेच परंतु बहुसंख्येने असलेला दलीत – आदिवासी विद्यार्थीवर त्यांचा विचार बळजबरीने थोपविण्याचा हा प्रकार आहे. याचा आम्ही तिव्र निषेध करत आहोत, असेही निवेदनात पुढे म्हटले आहे.
सदर नाट्यप्रयोगाचा विरोध करणाऱ्या संघटनांनमध्ये अखिल भारतीय आदिवासी युवा विकास परिषदेचे कुणाल कावे, सुरज मडावी, बादल मडावी, रुपेश सलामे, खुशाल मरस्कोल्हे, आदिवासी एकता युवा समितीचे उमेश उईके, आदिवासी टायगर सेनेचे लीना कोकोडे, अमोल कुळमेथे, जंगो रायताड महिला संघटनेच्या आरती कोल्हे, विद्या दुगा, शारदा मडावी, वीर शहीद बाबूराव प्रबोधन समितीचे डॉ. वसंत कुलसंगे, कम्युनिष्ठ पार्टी ऑफ इंडियाचे देवराव चवळे, अखिल भारतीय रिपब्लीकन पक्षाचे हंसराज उंदिरवाडे, अन्य संघटना व पक्षाचा समावेश आहे.
