अमित कत्तीवार
तालुका प्रतिनिधी
एटापल्ली : मुख्यमंत्री समृद्ध पंचायतराज अभियानांतर्गत गावांच्या सर्वांगीण व शाश्वत विकासाला चालना देण्यासाठी विविध उपक्रम राबविले जात आहेत. याच उपक्रमाच्या माध्यमातून ग्रामस्थांमध्ये जागरूकता निर्माण व्हावी, समाजात सकारात्मक बदल घडावा आणि ग्रामविकासासाठी लोकसहभाग वाढावा या उद्देशाने गुरुपल्ली येथे सुप्रसिद्ध खंजेरी वादक सत्यपाल महाराज यांचा समाजप्रबोधनात्मक प्रेरणादायी कार्यक्रम आयोजित करण्यात आला आहे. हा कार्यक्रम दिनांक 18 मार्च 2026 रोजी सायंकाळी 7 वाजता गुरुपल्ली येथे आयोजित करण्यात येणार असून या कार्यक्रमास जिल्हा परिषद गडचिरोलीचे मुख्य कार्यकारी अधिकारी मा. सुहास गाडे (भा.प्र.से.) प्रमुख उपस्थिती म्हणून लाभणार आहेत.
मुख्यमंत्री समृद्ध पंचायतराज अभियान हे राज्य शासनाचे महत्वाकांक्षी अभियान असून ग्रामीण भागातील विकासाला गती देण्याचे उद्दिष्ट त्यामागे आहे. गावांचा शाश्वत विकास, ग्रामस्वच्छता, पर्यावरण संरक्षण, शिक्षण, आरोग्य, व्यसनमुक्ती आणि सामाजिक ऐक्य यांसारख्या विषयांवर जनजागृती व्हावी यासाठी विविध सांस्कृतिक व प्रबोधनात्मक कार्यक्रमांचे आयोजन करण्यात येत आहे. याच अनुषंगाने आयोजित करण्यात येत असलेला सत्यपाल महाराज यांचा कार्यक्रम ग्रामस्थांसाठी मार्गदर्शक व प्रेरणादायी ठरणार असल्याचे आयोजकांनी सांगितले.
खंजेरी वादनाच्या माध्यमातून समाजप्रबोधन करणारे सत्यपाल महाराज हे आपल्या अनोख्या शैलीमुळे संपूर्ण राज्यात प्रसिद्ध आहेत. आपल्या कार्यक्रमांमधून ते व्यसनमुक्ती, शिक्षणाचे महत्व, सामाजिक एकोपा, स्वच्छता, पर्यावरण संवर्धन आणि ग्रामविकास या विषयांवर प्रभावी संदेश देत असतात. त्यांच्या सादरीकरणात संगीत, विनोद आणि समाजप्रबोधनाचा सुरेख संगम पाहायला मिळतो. त्यामुळे त्यांचे कार्यक्रम मोठ्या उत्साहात पार पडतात आणि श्रोत्यांवर दीर्घकालीन प्रभावही निर्माण करतात.
गुरुपल्ली येथे होणाऱ्या या कार्यक्रमाच्या माध्यमातून ग्रामस्थांमध्ये विकासाच्या विविध संकल्पनांबाबत जागरूकता निर्माण करण्याचा प्रयत्न केला जाणार आहे. ग्रामविकासासाठी प्रत्येक नागरिकाने पुढाकार घेतल्यास गाव प्रगतीच्या मार्गावर जलदगतीने पुढे जाऊ शकते, हा संदेश या कार्यक्रमातून देण्यात येणार आहे. तसेच स्वच्छ आणि समृद्ध गाव उभारण्यासाठी नागरिकांची भूमिका किती महत्वाची आहे यावरही मार्गदर्शन करण्यात येणार आहे.
या कार्यक्रमास जिल्हा परिषद गडचिरोलीचे मुख्य कार्यकारी अधिकारी सुहास गाडे यांच्या उपस्थितीमुळे कार्यक्रमाचे महत्व अधिक वाढणार आहे. त्यांच्या मार्गदर्शनातून ग्रामपंचायत पदाधिकारी, अधिकारी आणि ग्रामस्थांना विकासाच्या विविध योजनांबाबत माहिती मिळण्याची अपेक्षा व्यक्त केली जात आहे.
तरी या समाजप्रबोधनात्मक प्रेरणादायी कार्यक्रमास परिसरातील सर्व अधिकारी, कर्मचारी, पत्रकार बांधव, परिसरातील नागरिक तसेच ग्रामस्थांनी मोठ्या संख्येने उपस्थित राहून कार्यक्रमाचा लाभ घ्यावा, असे आवाहन आयोजकांच्या वतीने करण्यात आले आहे. ग्रामविकासाच्या दिशेने एक सकारात्मक पाऊल म्हणून हा कार्यक्रम निश्चितच महत्वाचा ठरणार असल्याचा विश्वास व्यक्त केला जात आहे.
